Президент Гаглойты Алан тæфæрфæс ракодта номдзыд композитор Плиты Жаннæйы мæлæты фæдыл.
Тæфæрфæсы телы дзырдæуы:
«Зынгæ ирон композитор Плиты Василы чызг Жаннæйы ацыд ирон культурæйæн у стыр зиан. Уый уыд ирон адæмы музыкалон гений. Йæ аивады баиу сты националон мотивтæ æмæ æппæтдунеон мидис.
Ахæм æнахуыр, курдиатджын адæймæгты цард арæх æмиу вæййы стыр зындзинæдтимæ, адæм сæ нæ фембарынц, уымæн æмæ уыдон сæ дуджы разæй цæуынц, равгон фæлгæттæй хизынц. Хъыгагæн нын алы хатт нæ фæвæййы фадат, цæмæй сын æмбæлон кад скæнæм сæ удæгасæй, æмбæлон хъарм хъусдардæй сæ схайджын кæнæм. Уый тыххæй сæ хатыр курæм.
Плиты Жаннæ уыд æнæкæрон курдиаты хицау, æппæтудæй йæ цардыхæсæн æнувыд. Композиторы уацмыстæ мыггагмæ баззайдзысты дунеон музыкалон аивады сыгъзæрин фонды.
Плиты Жаннæйы лæггæдтæ егъау æмæ уæзгæ сты ирон адæмы раз. Æмæ йæ рухс ном æнустæм фыст у нæ национ историйы».
